西洋《激戰》 英超兵變拳王

仲記得48歲老拳手賤輝喺港產片《激戰》入面，臨尾買自己連贏3場，結果勁執一筆，夠佢還大耳窿兼以後都唔使再打MMA。喺現實生活原來都有咁嘅人，現年33歲嘅前英超球員活侯斯中途出家，8年前先開始打拳，仲買自己會成為英國拳王，最終真係做到兼贏咗逾25.5萬鎊（約329萬港元），隨即割禾青宣佈退休唔再打拳。

[b]買自己做拳王執329萬[/b]
曾經係英格蘭U21國腳、效力過錫菲聯、伯明翰及侯城嘅活侯斯，上周六喺侯城舉行嘅一場輕中量級挑戰賽，點數贏衞冕嘅達倫咸姆頓，爆大冷做咗英國拳王。查實佢好耐之前就立志做英國拳王，仲喺有51倍時重槌5,000鎊，家陣佢夢想成真，仲勁執255,000鎊；而佢亦見好即收，賽後宣佈埋退出拳壇。
曾經喺02/03球季幫伯明翰踢過英超嘅活侯斯話：「我唔敢相信。當我10歲嘅時候，好多人同我講我唔可能成為足球員，而且仲笑我。當我話要做專業拳手嘅時候，每一個人亦都嘲笑我。我可以大膽講句，我係英國拳王。我亦要將呢個榮譽獻畀過咗身嘅爸爸。」

[b]見好就收即時退休[/b]
將拳擊生涯嘅戰績改寫成22勝6負嘅活侯斯話：「係人都知我爸爸喺年5年前過身。我最後一樣同佢講嘅嘢，就係話自己要成為英國拳王。」講到自己嘅退休計劃，佢講：「今晚已係我拳擊生涯嘅高𥧌，故我想以拳王身份引退。」
有指活侯斯重槌買自己做拳王，佢好玄咁講：「有傳我喺賠率有51倍時，重槌5,000鎊買自己做拳王，我唔會證實亦唔否認。總之我請飲嘢啦！」喺2012年掛靴唔再踢波，𠵱家係英格蘭半職業球會Goole領隊嘅活侯斯，查實細個時好勇鬥狠，打交次數有成100次咁多，如果佢當日唔踢波而選擇打拳，佢嘅事業可能發展得仲好。

[img]http://static.apple.nextmedia.com/images/apple-photos/apple/20140224/large/aa0401a.gif[/img]


來源:蘋果日報網站