金妍兒戀上　來自冰球的你

咪以為又叻又靚嘅女仔，揀男朋友嗰陣會揀番同自己一樣嘅級數，就好似俄羅斯女網球手舒拉寶娃咁，佢男友係保加利亞二線網球手狄美托夫；估唔到連南韓花滑女王金妍兒亦都係咁。南韓傳媒日前大爆金妍兒已經有男友，仲出埋佢哋喺舊年嘅拍拖相，但呢個哥仔唔係藝人、足球員或棒球員，只係個「來自冰球的你」嘅二打六咋！

前年訓練時撻着
南韓娛樂網站日前上載咗奧運兼世界冠軍金妍兒同個男仔嘅拍拖相，消息話呢個咁好彩嘅哥仔叫金元中，現年29歲、身高1米80，望落都ok靚仔。再挖深啲，原來金元中本身係喺國內玩冰球，仲係南韓冰球隊隊長，幫國家隊贏過亞冬運銅牌，𠵱家服緊兵役。
聽聞金元中喺2012年7月，喺泰陵訓練中心認識金妍兒，由於大家都係玩冰上運動，加上都係讀高麗大學，所以好快就撻着。消息人士仲話，佢哋由於好忙，所以多數喺生日或者聖誕節先至見面；而且拍拖拍得好低調，好多時會利用訓練放飯嗰兩粒鐘，喺泰陵選手村附近嘅烤肉店撐枱腳。

事務所證實戀情
喺拍拖相中，23歲嘅金妍兒除咗攬住金元中條腰，仲蹺住對方隻手，若然係普通朋友，點會咁親密吖！至於金妍兒所屬嘅事務所All That Sports Co隨後表示，報道大部份屬實，亦承認二人蜜運中，但就冇再作進一步回應。
喺索契冬奧後退役嘅金妍兒，人又靚滑冰又叻，所以之前同佢傳出緋聞嘅，都係好有級數嘅男人（見附表），例如係奧運金牌泳手朴泰桓、前南韓國家足球隊隊長朴智星、英超阿仙奴球星朴主永同埋當紅藝人張根碩等。但喺舊年賺咗1,400萬美金（約1.1億港元）嘅金妍兒之前講過，男友除咗要高過佢（金妍兒身高1米65）之外，仲要唔好逞強，有困難嗰陣會搵佢一齊解決。或者係呢啲原因，金元中先成功打動金妍兒芳心，成功贏得美人歸啦！


[img]http://static.apple.nextmedia.com/images/apple-photos/apple/20140307/large/aa0801a.gif[/img]
■着住國家隊外套嘅金妍兒（左）拍拖嗰陣，攬住冰球男友金元中條腰。互聯網


來源:蘋果日報網站